Rais wa Zanzibar na Mwenyekiti wa Baraza la Mapinduzi Dkt. Hussein Ali Mwinyi amesema Tanzania imeweka kipaumbele kuongeza uwekezaji katika elimu, afya, na huduma nyingine za kijamii pamoja na kilimo kinachozingatia hali ya hewa na mazingira.

Rais Dkt. Mwinyi ameyasema hayo Desemba 06, 2023 akimwakilisha Rais wa Jamhuri ya Muungano wa Tanzania, Dkt Samia Suluhu Hassan wakati akifungua Mkutano wa Kimataifa wa Tathmini ya muda wa kati wa mzunguko wa 20 wa Benki ya Dunia (IDA20 Mid Term Review) unaofanyika hoteli ya Golden Tulip, Mkoa wa Mjini Magharibi, Zanzibar.

Dkt. Mwinyi ameeleza kuwa Tanzania imeendelea kuchukua hatua za kukuza uchumi na kupunguza umasikini.

Kwa upande mwingine Rais Dkt.Mwinyi amesema uchumi wa Zanzibar unanufaika na utalii wa kitamaduni ikiwemo Mji mkongwe ambao ni eneo la urithi wa dunia .

Vilevile Zanzibar ilipata msaada kutoka IDA fedha za kigeni dola za kimarekani Milioni 93 ili kuboresha upatikanaji wa huduma za mijini na kuhifadhi mazingira ya urithi wa kitamaduni.

Mkutano huo unaohusisha wakopaji, nchi wahisani na Menejimenti ya Benki ya Dunia unafanyika kuanzia Disemba 06 hadi 08, 2023.